ເຊິ່ງໄດ້ເຂົ້າຮ່ວມກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ IX ຂອງຂະແໜງສຶກສາທິການ ແລະ ກິລາ ຮູບແບບທາງໄກ ຜ່ານໂປຣແກຣມ MS Teams.

ກອງປະຊຸມດັ່ງກ່າວ, ໄດ້ມີຂຶ້ນລະຫວ່າງວັນທີ 21-22 ທັນວາ 2021 ທີ່ກະຊວງສຶກສາທິການ ແລະ ກິລາ, ໂດຍພາຍໃຕ້ການເປັນປະທານຂອງ ສະຫາຍ ຮສ.ປອ ພຸດ ສິມມາລາວົງ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງສຶກສາທິການ ແລະ ກິລາ, ມີບັນດາຄະນະປະຈຳພັກ, ຄະນະພັກ, ຄະນະລັດຖະມົນຕີ ສສກ, ເລຂາຄະນະພັກຮາກຖານ ມະຫາວິທະຍາໄລແຫ່ງຊາດ, ມະຫາວິທະຍາໄລ ສຸພານຸວົງ, ມະຫາວິທະຍາໄລ ຈຳປາສັກ ແລະ ມະຫາວິທະຍາໄລ ສະຫວັນນະເຂດ, ຫົວໜ້າຫ້ອງການ, ຫົວໜ້າກົມ, ເລຂາຄະນະພັກຮາກຖານ, ເລຂາໜ່ວຍພັກຮາກຖານພະແນກສຶກສາທິການ ແລະ ກິລາແຂວງ/ນະຄອນຫຼວງ, ເລຂາ ແລະ ປະທານອົງການຈັດຕັ້ງມະຫາຊົນຂັ້ນກະຊວງ, ປະທານ-ຮອງປະທານ ແລະ ຄະນະປະຈຳສະມາຄົມການສຶກສາພາກເອກະຊົນ, ຫ້ອງການສຶກສາທິການ ແລະ ກິລາເມືອງ/ນະຄອນ, ຜູ້ເຮັດວຽກງານຈັດຕັ້ງທຸກຂັ້ນ ຕະຫຼອດຮອດພະນັກງານທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມ, ສະຫາຍ ຮສ.ປອ ພຸດ ສິມມາລາວົງ ໄດ້ກ່າວໄຂກອງປະຊຸມວ່າ: ເພື່ອຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດມະຕິຂອງກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກ ກະຊວງສຶກສາທິການ ແລະ ກິລາ, ປະຕິບັດ 2 ວາລະແຫ່ງຊາດ, ເຜີຍແຜ່ເຊື່ອມຊຶມ ແລະ ຜັນຂະຫຍາຍມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI ໂດຍສຸມໃສ່ການສ້າງການຫັນປ່ຽນໃໝ່ຢ່າງແຂງແຮງ ແລະ ເລິກເຊິ່ງໃນວຽກງານພະນັກງານບົນຈິດໃຈບຸກທະລຸຢ່າງແຂງແຮງ. ອົງຄະນະພັກກະຊວງສຶກສາທິການ ແລະ ກິລາສະໄໝທີ IX ໄດ້ນຳພາ-ຊີ້ນຳ ສຸມໃສ່ເຮັດສຳເລັດໜ້າທີ່ການເມືອງຂອງຕົນເປັນຢ່າງດີ. ຄະນະພັກແຕ່ລະຂັ້ນ ພ້ອມດ້ວຍພະນັກງານ, ສະມາຊິກພັກ ໄດ້ເຊີດຊູຄວາມສາມັກຄີພາຍໃນຢ່າງ ແໜ້ນແຟ້ນ, ໄດ້ນຳພາ-ຊີ້ນຳສ້າງຂະບວນການທີ່ສຳຄັນໃນວຽກງານການເມືອງ ແລະ ວຽກງານວິຊາສະເພາະ; ບັນດາຄະນະພັກລ້ວນແຕ່ເປັນເຈົ້າການແຂ່ງຂັນກັນສ້າງຜົນງານ, ບັນດາສະມາຊິກພັກ-ພະນັກງານກໍໄດ້ເປັນເຈົ້າການເຂົ້າຮ່ວມປະກອບສ່ວນເຂົ້າໃນວຽກງານທຸກໆດ້ານຢ່າງຫ້າວຫັນ. ພ້ອມກັນນັ້ນ, ພວກເຮົາກໍໄດ້ມີການປັບປຸງປົວແປງພາຍໃນພັກດ້ວຍການເປີດບັ້ນດຳເນີນຊີວິດການເມືອງຢ່າງກວ້າງຂວາງ, ໄດ້ລົງຕິດຕາມ, ກວດກາການຈັດຕັ້ງປະຕິບັດແຜນການ ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນຢ່າງເປັນປົກກະຕິ ໂດຍຕິດພັນກັບການເສີມຂະຫຍາຍປະຊາທິປະໄຕພາຍໃນພັກ, ໃຫ້ສະມາຊິກພັກໄດ້ເຂົ້າຮ່ວມໃນການຄົ້ນຄວ້າ, ປະກອບຄຳຄິດຄຳເຫັນເຂົ້າໃນວຽກງານ ກໍຄື ເອກະສານສຳຄັນຕ່າງໆ.

ພ້ອມກັນນີ້, ຍັງຈະໄດ້ຮັບຟັງການເຜີຍແຜ່ເຊື່ອມຊຶມບັນດາເອກະສານທີ່ສຳຄັນ ເປັນຕົ້ນແມ່ນ ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI; ບົດໂອ້ລົມຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກ; ມະຕິ 04/ຄລສພ ວ່າດ້ວຍເພີ່ມທະວີການນໍາພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ວຽກງານພະນັກງານ; ຜ່ານ (ຮ່າງ) ບົດລາຍງານການຈັດຕັ້ງປະຕິບັດວຽກງານຈັດຕັ້ງ, ກໍ່ສ້າງພັກ-ພະນັກງານ 5 ປີ (2016-2020) ແລະ ທິດທາງແຜນການໃນຕໍ່ໜ້າ ແຕ່ປີ 2021-2025. ພ້ອມກັນນັ້ນ, ຈະໄດ້ຮັບຟັງການປະກອບຄໍາເຫັນຈາກ 6 ພາກສ່ວນ ປະກອບມີ ການສ້າງຊັບພະຍາກອນມະນຸດ ເພື່ອຕອບສະໜອງຄວາມຮຽກຮ້ອງຕ້ອງການໃນການພັດທະນາເສດຖະກິດ-ສັງຄົມ ໃນໄລຍະໃໝ່ (ມະຫາວິທະຍາໄລແຫ່ງຊາດ); ການປະຕິບັດໂຄງການຍົກສູງຄຸນນະພາບການສຶກສາຕາມທິດ 3 ສ້າງ (ຫ້ອງການກະຊວງ); ການສ້າງສີມືແຮງງານທີ່ມີຄຸນນະພາບ ເພື່ອຕອບສະໜອງໃຫ້ແກ່ຄວາມຕ້ອງການຂອງຕະຫລາດແຮງງານ (ກົມອາຊີວະສຶກສາ); ການບໍາລຸງສ້າງພະນັກງານ ແລະ ການປະຕິບັດແຜນກໍານົດພະນັກງານນໍາພາ-ຄຸ້ມຄອງຂອງພະແນກສຶກສາທິການ ແລະ ກິລາ ແຂວງອຸດົມໄຊ; ການບໍາລຸງສ້າງພະນັກງານ ແລະ ການປະຕິບັດແຜນກໍານົດພະນັກງານນໍາພາ-ຄຸ້ມຄອງຂອງພະແນກສຶກສາທິການ ແລະ ກິລາ ແຂວງສາລະວັນ; ການກໍ່ສ້າງພະນັກງານໜຸ່ມ, ຊາວໜຸ່ມຂອງອົົງຄະນະພັກກະຊວງສຶກສາທິການ ແລະ ກິລາ (ຄະນະບໍລິຫານງານຊາວໜຸ່ມ ປປລ ກະຊວງສຶກສາທິການ ແລະ ກິລາ).

ສະຫາຍ ຮສ.ປອ ພຸດ ສິມມາລາວົງ ກ່າວຕື່ມອີກວ່າ: ກອງປະຊຸມວຽກງານຈັດຕັ້ງຂອງຂະແໜງການສຶກສາທິການ ແລະ ກິລາຄັ້ງນີ້ ມີຄວາມສຳຄັນຫຼາຍ ພວກເຮົາຈະໄດ້ພ້ອມກັນສະຫລຸບຕີລາຄາຄືນການຈັດຕັ້ງປະຕິບັດທິດທາງວຽກງານ ແລະ ຜັນຂະຫຍາຍວຽກງານຈັດຕັ້ງທົ່ວປະເທດ ຄັ້ງທີ X ແລະ ວຽກງານຈັດຕັ້ງ ຄັ້ງທີ VIII ຂອງອົງຄະນະພັກກະຊວງສຶກສາທິການ ແລະ ກິລາ ໄດ້ວາງອອກໃຫ້ເລິກເຊິງ, ຖືກກັບຄວາມເປັນຈິງ, ຍົກໃຫ້ເຫັນດ້ານຜົນສຳເລັດທີ່ຕັ້ງໜ້າ, ດ້ານອ່ອນ, ຂໍ້ຄົງຄ້າງທີ່ຈະຕ້ອງໄດ້ປັບປຸງແກ້ໄຂ, ຊອກໃຫ້ເຫັນສາເຫດ ແລະ ບົດຮຽນທີ່ຖອດຖອນໄດ້, ແນໃສ່ປັບປຸງກໍ່ສ້າງພັກເຮົາໃຫ້ປອດໃສ, ເຂັ້ມແຂງ, ໜັກແໜ້ນ, ປະຕິບັດການຫັນປ່ຽນຢ່າງແຂງແຮງ ແລະ ເລິກເຊິ່ງ ວຽກງານພະນັກງານໃຫ້ເປັນຮູບປະທໍາຕົວຈິງ, ພ້ອມທັງກຳນົດທິດທາງໜ້າທີ່, ບັນດາຄາດໝາຍທີ່ຕ້ອງໄດ້ສູ້ຊົນປະຕິບັດໃນຕໍ່ໜ້າ, ບັນດາເນື້ອໃນທີ່ຈະນຳມາເຜີຍແຜ່, ນຳສະເໜີ ແລະ ປຶກສາຫາລືຢູ່ໃນກອງປະຊຸມຄັ້ງນີ້ ລ້ວນແລ້ວແຕ່ມີຄວາມສຳຄັນຫລາຍຕໍ່ວຽກງານຈັດຕັ້ງ, ກໍ່ສ້າງພັກ-ພະນັກງານ, ຂ້າພະເຈົ້າ ຂໍຮຽກຮ້ອງໃຫ້ບັນດາສະຫາຍຄະນະພັກທຸກຂັ້ນ ແລະ ຜູ້ແທນກອງປະຊຸມທຸກສະຫາຍ ສຸມສະຕິປັນຍາໃສ່ການຄົ້ນຄວ້າ, ປະກອບຄຳເຫັນໃຫ້ລົງເລິກ, ກົງໄປກົງມາ ເພື່ອເຮັດໃຫ້ເນື້ອໃນກອງປະຊຸມມີຄວາມຈະແຈ້ງ, ຮັດກຸມ, ຄົບຖ້ວນ ແລະ ມີຄວາມເປັນເອກະພາບສູງຕໍ່ບັນຫາຕ່າງໆ, ຫລີກເວັ້ນການປະກອບຄຳເຫັນທີ່ມີລັກສະນະລວມໆ, ອັນສຳຄັນແມ່ນໃຫ້ບັນດາສະຫາຍພ້ອມກັນລົງເລິກປະກອບຄຳເຫັນໃສ່ບັນຫາຕ່າງໆທີ່ຈະຕ້ອງສືບຕໍ່ປັບປຸງແກ້ໄຂໃນຕໍ່ໜ້າ.

ຂອບໃຈ ຂ່າວ ຈາກເພຈ: ໜັງສືພິມສຶກສາ-ກິລາລາຍວັນ