ວັນທີ 28 ກັນຍາ 2022, ວິທະຍາໄລເຕັກນິກ-ວິຊາຊີບຫຼວງພະບາງ ໄດ້ຈັດພິທີສະຫຼຸບການຮຽນ-ການສອນ ປະຈຳສົກຮຽນ 2021-2022 ແລະເປີດການຮຽນ-ການສອນ ປະຈຳສົກຮຽນ 2022-2023 ຂື້ນ ທີ່ສະໂມສອນຂອງວິທະຍາໄລເຕັກນິກວິຊາຊີບ ໂດຍການເປັນປະທານຂອງ ທ່ານ ບຸນເຫຼື່ອມ ມະນີວົງ ຄະນະປະຈຳພັກແຂວງ ຮອງເຈົ້າແຂວງຫຼວງພະບາງ, ມີເຈົ້ານະຄອນຫຼວງພະບາງ, ຮອງຫົວໜ້າຈັດຕັ້ງແຂວງຫຼວງພະບາງ, ຜູ້ອຳນວຍການວິທະຍາໄລເຕັກນິກວິຊາຊີບ ພ້ອມດ້ວຍຄະນະ, ພະນັກງານຄູ-ອາຈານ, ແຂກທີ່ຖືກເຊີນຈາກພະແນກການອ້ອມຂ້າງແຂວງ ແລະ ນັກສຶກສາເຂົ້ານຮ່ວມ.

ໃນພິທີ ທ່ານ ອານຸວົງ ສີສຸພັນ ປະທານກວດກາ ຮອງຜູ້ອຳນວຍການວິທະຍາໄລ ໄດ້ຂື້້ນຜ່ານ ບົດສະຫຼຸບການຮຽນ-ການສອນ ປະຈຳສົກຮຽນ2021-2022 ແລະທິດທາງແຜນການ ປະຈໍາສົກຮຽນ 2022-2023. ຈາກນັ້ນ ກໍ່ໄດ້ມອບໃບຍ້ອງຍໍ ໃຫ້ນັກສຶກສາທີ່ມີຜົນງານດີເດັ່ນໃນການສຶກສາຮໍ່າຮຽນຕະລອດໄລຍະ 1ປີຜ່ານມາ, ໃນນັ້ນ ປະເພດI ຈຳນວນ 84 ນ້ອງ, ຍິງ 43 ນ້ອງ, ປະເພດ II ຈຳນວນ 136 ນ້ອງ, ຍິງ 47 ນ້ອງ, ປະເພດ III ຈຳນວນ 51 ນ້ອງ, ຍິງ 132 ນ້ອງ, ພ້ອມນີ້ກໍ່ມອບປະກາສະນິຍະບັດ ໃຫ້ນັກສຶກສາທີ່ເສັງຈົບ ໃນສົກຮຽນ 2021-2022 ຈຳນວນ 629 ນ້ອງ, ຍິງ 190 ນ້ອງ. ໂອກາດນີ້ທ່ານ ບຸນເລື່ອມ ມະນີວົງ ກໍ່ໄດ້ມີຄຳເຫັນໂອລົມ ແລະ ໃຫ້ທິດຊີ້ນຳ ໃຫ້ແກ່ພະນັກງານຄູ-ອາຈານ ແລະ ນັກສຶກສາທີ່ຈົບໃໝ່ ໃຫ້ສືບຕໍ່ປະຕິບັດໜ້າທີ່ວຽກງານຂອງຕົນໃຫ້ປະສົບຜົນສຳເລັດ ແລະປະກອບສ່ວນເຂົ້າໃນວຽກງານຂອງລັດກໍ່ປະກອບອາຊີບດ້ວຍຄວາມສຸດຈະລິດ ແລະຖືກຕ້ອງຕາມກົດໝາຍບ້ານເມືອງ.

ຂ່າວໂດຍ: ສົມຈິດ ໄຊຍະຜົນ