ໃນລະຫວ່າງວັນທີ 25-26 ພຶດສະພາ 2023 ທີ່ຜ່ານມາ, ວິທະຍາໄລເຕັກນິກ-ວິຊາຊີບຫຼວງພະບາງ ຮ່ວມກັບ ພະແນກສຶກສາທິການ ແລະ ກິລາແຂວງຫຼວງພະບາງ ໄດ້ລົງແນະນຳ ແລະ ໃຫ້ຄຳປຶກສາດ້ານອາຊີບ ທີ່ໂຮງຮຽນມັດທະຍົມສົມບູນ ເດັກກຳພ້າ ໂດຍພາຍໃຕ້ການເປັນປະທານຮ່ວມຂອງທ່ານ ບຸນເພັງ ແຈ່ມມາໄລ ຮອງຜູ້ອຳນວຍການວິທະຍາໄລ, ທ່ານ ສົມພອນ ດີລີວົງ ຫົວໜ້າຂະແໜງອາຊີວະສຶກສາ ແລະ ການສຶກສາຊັ້ນສູງ ພະແນກສຶກສາທິການ ແລະ ກິລາແຂວງ, , ທ່ານ ຈັນທອນ ເພັງພະຈັນຜູ້ອຳນວຍການໂຮງຮຽນມັດທະຍົມສົມບູນເດັກກຳພ້າ, ມີພະນັກງານຄູ-ອາຈານ ແລະ ນັກຮຽນເຂົ້າຮ່ວມເປັນຈຳນວນຫຼາຍ. ຈຸດປະສົງຂອງການລົງເຮັດວຽກໃນຄັ້ງນີ້ ເພື່ອເຜີຍແຜ່ການຮຽນ-ການສອນ ໃນສາຂາອາຊີບອາຊີວະສຶກສາແບບຄວບຄູ່(ອສຄ), ໃຫ້ຜູ້ເຂົ້າຮ່ວມໄດ້ເຂົ້າໃຈຄວາມແຕກຕ່າງຂອງການຮຽນ-ການສອນ ແບບດັ້ງເດີມ, ແບບຄວບຄູ່ ແລະ ແບບເນັ້ນສະມັດຖະພາບ. ກຸ່ມເປົ້າໝາຍກໍ່ແມ່ນນັກຮຽນຊັ້ນມໍ4 ແລະ ມໍ7 ເພື່ອໃຫ້ເຂົາເຈົ້າໄດ້ຕັດສິນໃຈເລືອກຮຽນໃນສາຂາອາຊີບທີ່ຕົນເອງມັກ ແລະ ຖະນັດ, ນອກຈາກນັ້ນ ໃນພິທີຍັງນັກຮຽນຍັງໄດ້ມີສ່ວນຮ່ວມໃນການສະແດງຄວາມຄິດເຫັນ ໃນສາຂາທີ່ຕົນມັກ ກ່ອນເຂົ້າຮຽນ.
ການລົງໄປໃນຄັ້ງນີ້ ແມ່ນໄດ້ໃຊ້ເວລາ 2 ວັນຈຶ່ງສຳເລັດ ແລະ ນັກຮຽນທຸກຄົນແມ່ນໄດ້ລົງໄປສຳພັດ ແລະ ຢ້ຽມຊົມ ກັບສະຖານປະກອບການ ໃນຫຼາຍສາຂາອາຊີບເຊັ່ນ: ໂຮງແຮມຫຼວງພະບາງວີວ ໃນສາຂາການບໍລິການໂຮງແຮມ ມີພະແນກບໍລິການສ່ວນໜ້າ ແລະ ຂະແໜງແມ່ບ້ານ, ຮ້ານສ້ອມແປງເຄື່ອງເຮັດຄວາມເຢັນ ທ່ານ ຕຸ້ຍ ໃນສາຂາຊ່າງສ້ອມແປງເຄື່ອງເຮັດຄວາມເຢັນ-ເຄື່ອງປັບອາກາດ ແລະ ສະຖານີໄຟຟ້າ ຂົວທີ່ 1 ໃນສາຂາຊ່າງໄຟຟ້າເຕັກນິກ.
ການຮຽນ-ການສອນອາຊີວະສຶກສາແບບຄວບຄູ່ ຜູ້ຮຽນແມ່ນຈະໄດ້ລົງປະຕິບັດຕົວຈິງຢູ່ສະຖານປະກອບການໃນທຸກໆປີ ຈົນຮຽນຈົບ. ສຳລັບງົບປະມານການລົງເຮັດວຽກໃນຄັ້ງນີ້ ແມ່ນໄດ້ຮັບການສະໜັບສະໜູນຈາກໂຄງການພັດທະນາອາຊີວະສຶກສາ ສາທາລະນະລັດ ປະຊາທິປະໄຕ ປະຊາຊົນລາວ (VELA) ຈັດຕັ້ງປະຕິບັດໂດຍ GIZ ຮ່ວມກັບຄູ່ຮ່ວມງານທີ່ສຳຄັນ ຈາກ ກະຊວງສຶກສາທິການ ແລະ ກິລາ ແລະ ສະພາການຄ້າ ແລະ ອຸດສະຫຳແຫ່ງຊາດລາວ.
ຂ່າວ:ສົມຈິດ ໄຊຍະຜົນ
: