ພິທີສະຫຼຸບການຮຽນ-ການສອນ ປະຈຳສົກຮຽນ 2022 - 2023 ທີ່ວິທະຍາໄລເຕັກນິກ-ວິຊາຊີບ ຫຼວງພະບາງ

ວັນທີ 21 ສິງຫາ 2023 ທີ່ຜ່ານມາ, ວິທະຍາໄລເຕັກນິກ-ວິຊາຊີບຫຼວງພະບາງ ໄດ້ຈັດພິທີ ສະຫຼຸບການຮຽນ-ການສອນ ປະຈຳສົກຮຽນ 2022 - 2023 ຂື້ນທີ່ສະໂມສອນຂອງວິທະຍາໄລ, ໂດຍໃຫ້ກຽດເປັນປະທານ ຂອງ ທ່ານ ປະລິນຍາເອກ ຄຳຄ່ອງ ພົມມະປັນຍາ ຄະນະປະຈຳພັກແຂວງ ຫົວໜ້າພະແນກຈັດຕັ້ງແຂວງ ຫຼວງພະບາງ, ທ່ານ ບຸນເລີດ ຫຼວງປະເສີດ ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ , ໃນນາມຕາງໜ້າ ຄະນະຊີ້ສູນບໍລິການ ອາຊີວະສຶກສາແບບຄວບຄູ່ (DCTSC) ພ້ອມທີມງານ ອາຊີວະສຶກສາແບບຄວບຄູ່, ທ່ານ ບຸນທ່ຽງ ສຸລິວັນ ປະທານສະພາການຄ້າ ແລະ ອຸດສະຫະກຳແຂວງຫູວງພະບາງ, ທ່ານ ບຸນປັນ ທຳມະລັງກາ ຜູ້ອຳນວຍການວິທະຍາໄລ ພ້ອມດ້ວຍຄະນະ, ແຂກທີ່ຖືກເຊີນ, ສະຖານປະກອບການ, ພະນັກງານຄູ-ອາຈານ, ນັກສຶກສາ, ພໍ່ແມ່ຜູ້ປົກຄອງ ແລະ ພາກສ່ວນຕ່າງໆເຂົ້າຮ່ວມ.

ຈຸດປະສົງຂອງງານໃນຄັ້ງນີ້ ແມ່ນເພື່ອສະຫຼຸບການຮຽນ-ການສອນປະຈຳສົກຮຽນ2022-2023 ແລະ ວາງທິດທາງແຜນການຕໍ່ໜ້າເປີດສົກຮຽນ 2023-2024, ມອບໃບຢັ້ງຍືນໃຫ້ນັກຮຽນນັກສຶກສາທີ່ມີຜົນງານດີເດັ່ນ ແລະ ມອບປະກາສະນີຍະບັດ ໃຫ້ນັກຮຽນນັກສຶກສາຜູ້ທີ່ສຳເລັດການສຶກສາໃນສົກຮຽນ 2022-2023 ຈໍານວນ 454 ຄົນ, ຍິງ 135 ຄົນ. ໃນນັ້ນ ປະກາສະນິຍະບັດຊັ້ນສູງ ມີ 166 ຄົນ, ຍິງ 49 ຄົນ ແລະ ປະກາສະນິຍະບັດຊັ້ນກາງ ມີ 288 ຄົນ, ຍິງ 86 ຄົນ.
ໃນພິທີດັ່ງກ່າວ ສູນບໍລິການອາຊີວະສຶກສາແບບຄວບຄູ່, ສະພາການຄ້າ ແລະ ອຸດສາຫະກຳ ແຫ່ງຊາດລາວ ໄດ້ນຳສະເໜີການຢັ້ງຢືນສະຖານປະກອບການທີ່ມີສ່ວນຮ່ວມໃນການຈັດຕັ້ງການຮຽນ-ການສອນອາຊີ
ວະສຶກສາແບບຄວບຄູ່ (ພາກທິດສະດີ ໃນສະຖາບັນການສຶກສາ ແລະ ພາກປະຕິບັດຕົວຈິງໃນ ສະຖານປະກອບການ). ຈາກນັ້ນ, ໄດ້ມີການມອບໃບຢັ້ງຢືນ, ປ້າຍສັນຍາລັກ ອາຊີວະສຶກສາແບບຄວບຄູ່, ແລະ ໂລໂກ້ ອາຊີວະສຶກສາແບບຄວບຄູ່ ໃຫ້ບັນດາຄູ່ຮ່ວມ ສະຖານປະກອບການ, ບໍລິສັດໃນການເປັນຄູ່ຮ່ວມຈັດຕັ້ງປະຕິບັດວຽກງານ ອາຊີວະສຶກສາແບບຄວບຄູ່ ຈຳນວນ 32 ບໍລິສັດ ໃນແຂວງຫຼວງພະບາງ.
ຕອນທ້າຍຂອງພິທີ ທ່ານ ປະທານ ກໍ່ໄດ້ໃຫ້ທິດຊີ້້ນຳ ແລະ ໃຫ້ຄຳໂອ້ວາດຕັກເຕືອນແກ່ຜູ້ສຳເລັດການສຶກສາໃໝ່ ໃຫ້ເອົາໃຈໃສ່ໃນການເຝິກຝົນຫຼໍ່ຫຼອມຕົນເອງ ໃຫ້ເປັນຄົນດີຂອງສັງຄົມ, ມີການງານທີ່ໝັ້ນຄົງ ແລະ ສືບຕໍ່ໃນການພັດທະນາທາງດ້ານຄວາມຮູ້ ຄວາມສາມາດຂອງຕົນ ໃຫ້ເທົ່າທຽມກັບສາກົນ.
ຂ່າວ: ສົມຈິດ ໄຊຍະຜົນ