ວັນທີ 4 ຕຸລາ 2023, ວິທະຍາໄລເຕັກນິກ-ວິຊາຊີບຫຼວງພະບາງ ໄດ້ເປີດກອງສະຫລຸບວຽກງານຮອບດ້ານ ປະຈຳສົກຮຽນ 2022-2023 ແລະ ວາງແຜນທິດທາງວຽກງານ ປະຈໍາສົກຮຽນ 2023-2024 ພາຍໃຕ້ການເປັນປະທານ ຂອງ ທ່ານ ບຸນປັນ ທໍາມະລັງກາ ຜູ້ອໍານວຍການວິທະຍາໄລ, ມີຄະນະອຳນວຍການ, ຫົວໜ້າພະແນກ, ຫົວໜ້າພາກ ແລະ ພະນັກງານຄູ-ອາຈານ ພາຍໃນວິທະຍາໄລເຂົ້າຮ່ວມ ຈໍານວນ 100 ກວ່າທ່ານ. ໃນພິທີຄະນະຮັບຜິດຊອບ ກໍ່ໄດ້ຂື້ນລາຍງານວຽກງານທີ່ໄດ້ປະຕິບັດຜ່ານມາ ໃນນັ້ນ ມີວຽກງານບໍລິຫານບຸກຄະລາກອນ, ວຽກງານປັບປຸງພື້ນຖານໂຄງລ່າງ, ວຽກງານງົບປະມານ ແລະ ວຽກງານການຈັດການຮຽນ-ການສອນ. ໃນພິທີບັນດາຜູ້ເຂົ້າຮ່ວມໄດ້ມີການສົນທະນາ ແລະ ປະກອບຄຳເຫັນ ໃສ່ໃນບົດສະຫຼຸບ ເພື່ອເຮັດໃຫ້ມີເນື້ອໃນທີ່ຄົບຖ້ວນ ແລະ ສົມບູນຂື້ນຕື່ມ, ພ້ອມຜ່ານຂໍ້ຕົກລົງ ວ່າດ້ວຍການແຕ່ງຕັ້ງພະນັກງານດຳລົງຕຳແໜ່ງບໍລິຫານ ແລະ ຊັບຊ້ອນພະນັກງານຈຳນວນໜຶ່ງ ເຂົ້າບັນຈຸ ຕາມາມພະແນກການ ພາຍໃນວິທະຍາໄລ.
ທ່ານ ບຸນປັນ ທຳມະລັງກາ ຜູ້ອຳນວຍການວິທະຍາໄລ ໄດ້ກ່າວວ່າ: ເພື່ອໃຫ້ວຽກງານບໍລິຫານ ແລະ ວຽກງານການຮຽນ-ການສອນ ໃນສົກຮຽນ 2023-2024 ບັນລຸເປົ້າໝາຍທີ່ວາງໄວ້ ພະນັກງານທຸກຄົນ ຕ້ອງຮ່ວມແຮງ ຮ່ວມໃຈ ໃນການປະຕິບັດຕາມແຜນ ແລະ ທິດທາງທີ່ວາງ ໃຫ້ປະກົດຜົນເປັນຈິງ ພ້ອມດຽວກັນນັ້ນ, ບັນດາເນື້ອໃນຂອງບົດສະຫລຸບ ທີ່ໄດ້ຕົກລົງເປັນເອກະພາບ ຕ້ອງນໍາໄປປັບປຸງ ໃຫ້ມີຄວາມລະອຽດ ແລະ ຈະແຈ້ງໃຫ້ດີຂື້ນກວ່າເກົ່າ.
